ဥက္ကဋ္ဌ၏ သဝဏ်လွှာ

၂၀၁၅ ခုနှစ်၊ ဖေဖော်ဝါရီလ ၂၄ ရက်နေ့တွင် ရန်ကုန်မြို့၊ ဆူးလေဘုရားလမ်း၌ ငွေချေး သက်သေခံလက်မှတ်လုပ်ငန်း ကြီးကြပ်ရေးကော်မရှင်ရုံးကို စတင်ဖွင့်လှစ်ခဲ့ပြီး မြန်မာနိုင်ငံ၏ ပထမဆုံး စတော့အိတ်ချိန်းဖြစ်သော ရန်ကုန်စတော့အိတ်ချိန်းကို ဖွင့်လှစ်နိုင်ရန် ကြိုးပမ်း ဆောင်ရွက်ခဲ့ပါသည်။

၂၀၁၅  ခုနှစ်၊ ဒီဇင်ဘာ ၉ ရက်နေ့တွင် ရန်ကုန်စတော့အိတ်ချိန်းကို စတင်ဖွင့်လှစ်ခဲ့ပြီးနောက် First Myanmar Investment Co., Ltd. (FMI) ၏ အစုရှယ်ယာများကို ၂၅.၃.၂၀၁၆ ရက်နေ့တွင် စာရင်းဝင်အစုရှယ်ယာများအဖြစ် စျေးကွက်သို့ စတင်ရောင်းဝယ်နိုင်ခဲ့ပါသည်။

ဒုတိယစာရင်းဝင်ကုမ္ပဏီဖြစ်သော Myanmar Thilawa SEZ Holdings Public Co., Ltd (MTSH) ၏ အစုရှယ်ယာများကို ၂၀.၅.၂၀၁၆ ရက်နေ့တွင် လည်းကောင်း၊ တတိယစာရင်း ဝင် ကုမ္ပဏီဖြစ်သော Myanmar Citizens Bank Ltd (MCB) ၏ အစုရှယ်ယာများကို ၂၆.၈.၂၀၁၆ ရက်နေ့တွင် လည်းကောင်း၊ စတုတ္ထစာရင်းဝင်ကုမ္ပဏီဖြစ်သော First Private Bank  Ltd (FPB) ၏ အစုရှယ်ယာများကို ၂၀.၁.၂၀၁၇ ရက်နေ့တွင် ဆက်လက်ရောင်းဝယ်နိုင်ခဲ့ပါသည်။

ရန်ကုန်စတော့အိတ်ချိန်း၏ သက်တမ်းသည် အလွန်နုနယ်သေးပြီး အကောင်အထည်ဖော် ဆောင်ရွက်နေကြသည့် ဝန်ထမ်းများ၊ ငွေချေးသက်သေခံလက်မှတ်ကုမ္ပဏီများ ၊ စာရင်းဝင် အများ နှင့်သက်ဆိုင်သောကုမ္ပဏီများနှင့် တစ်ဦးချင်း ရင်းနှီးမြှုပ်နှံသူများအနေဖြင့် အရင်းအနှီးစျေးကွက် ဆိုင်ရာ အတွေ့အကြုံ၊ ဗဟုသုတလိုအပ်ချက်များ ရှိနေဆဲဖြစ်ပါသည်။

ဤလိုအပ်ချက်များကို ဖြည့်ဆည်းကုစားပေးနိုင်ပါရန် ငွေချေးသက်သေခံလက်မှတ်လုပ်ငန်း ကြီးကြပ်ရေးကော်မရှင်သည် ပြည်တွင်းပြည်ပ ကျွမ်းကျင်သူများနှင့် တိုင်ပင်ဆွေးနွေးလျက် ရေတို၊ ရေရှည် အစီအမံများ ချမှတ်ဆောင်ရွက်သွားမည်ဖြစ်ပါသည်။

မြန်မာနိုင်ငံ၏ ပထမဆုံးအရင်းအနှီးစျေးကွက်ဖြစ်သော ရန်ကုန်စတော့အိတ်ချိန်းတွင် အဓိက ပါဝင် ဆောင်ရွက်လျက်ရှိကြသည့် စာရင်းဝင်ကုမ္ပဏီများ၊ ငွေချေးသက်သေခံလက်မှတ် ကုမ္ပဏီများ၊ ရင်းနှီးမြှုပ်နှံသူများနှင့် စိတ်ပါဝင်စားသူ ပြည်သူများအားလုံး တူညီသောစိတ်ဓါတ်များဖြင့် ကော်မရှင်၏ ဦးဆောင်မှုနှင့်အတူ ပူးပေါင်းဆောင်ရွက်ကြပါရန် ပန်ကြားအပ်ပါသည်။